تحدي الـ29يوم - اليـوم العـاشر

يابة شلونهم الحلوين 

  بعد مرور عشر ايام من تحدي الـ 29 يوم يعني صارلي 10 ايام من بلشت اتعلم للدارت والفلاتر وتقريبا اني كل يوم اقضي مدة 3 الى 5 ساعات اتعلم وكل يوم اتعلم شي جديد جنت ما اعرفة سابقا 

جان هدفي بالبداية هو اتعلم لغة الدارت شلون أبرمج تطبيقات وطبعا أكيد حققت تقدم خلال هاي الايام

خل احجيلكم شوية عن الشغلات اللي تعلمتهة  

بأول اسبوع تعلمت اساسيات لغة الدارت اللي اساس الاكواد مالتي مستقبلا راح تكون مكتوبة بهاي اللغة 

 بعد الاسبوع الأول بلشت أتعلم لاساسيات الفلاتر تقريبا صارلي يومين من بلشت بيهة

وحاليا اني عرفت شنية هيكيلة التطبيق وشلون ابنيهة 

 وهذا هنا هيج مقطع اثناء كتابتي لكود بسيط بلغة دارت وضيفتة يجري عمليات حسابية على ارقام من اختيار المستخدم وكذلك المستخدم هو يختار شنو نوع العملية اللي يريد يجريهة

اني دا اتعلم هذا الشي عن طريق كورس عبر منصة يودمي وكذلك هواية شغلات دا استفاد منهة من موقع ٍستاك اوفر فلو

طبعا اني دا اواجه صعوبات خلال هاي الفترة بسبب الامتحانات وضعف الانترنت بس مع ذلك اني كلش راضي وفخور بالتقدم اللي حققته خلال هاي المدة وراح ابقة مستمر على هذا التحدي حتة بعد الـ29 يوم لان كلش حبيت الشي اللي دا اتعلمة واني كلش واثق انو خلال الـ29 يوم راح اوصل للهدف اللي جنت أطمحلة من البداية

والشي الاطمح اله هو خلال الـ10 ايام الجاية بعد متصيرعندي معرفة كافية اسوي تطبيق بسيط خاص بية

اخير شي احب اقدم امتناني لكل الاصدقاء اللي يشجعوني استمر ومنهم مرتضى وابو بكر

    

 شكرا لحسن استماعكم ونشوفكم بعد اسبوع او 10 ايام حسب