بعد مرور اسبوع من انطلاقة تحدي الـ29 يوم

هلاو شبايب

وياكم فهد من جديد اجة يدوخكم ويروح  

🙄هالمرة راح احجي بالعامية ذيج المرة فصحة لان تعرفون واجهة بالبداية حتة أبين واحد مثقف وكذا

 بعد مرور اسبوع واحد على الانطلاقة حبيت اشارك وياكم تقدمي

يلا نبلش ندوخكم شوية

قبل اسبوع بلشت اتعلم لغة برمجة جديدة الـ(دارت) بلشت بيهة من الصفر وبحماس, تقريبا خلال هذا الاسبوع يوميا اقضي فد من 3 الى 5 ساعات اتعلم واطبق برامج وافكار, المهم حاليا اني اعتبر نفسي تعلمت %70 من هاي اللغة خلال هذا الاسبوع, اني صحيح كملتهة وكملت البرمجة الكائنية مالتهة بس مع ذلك احس احتاج تدريب عليهة اكثر, يمكن راح تكولون شبسرعة كملتهة اكلكم السبب اللي خلاني اتعلمهة بهاي السرعة هو لان اني متعلم لغة الـ(سي ++) ولغة الـ(دارت) حسيتهة تشبه الـ(سي ++) لذلك تعلمتهة بسرعة مع العلم اني الـ(سي ++) طولت بيهة يمكن سنة حتة تعلمتهة لان جانت اول لغة اتعلمهة, المهم ماطول عليكم اكثر بعد خل احجيلكم عن الخطوة الجاية

الخطوة الجاية اريد اتعلم للـ(فلاتر) واللي هو راح يكون باب دخولي لعالم برمجة التطبيقات بس هنا راح يصير اختلاف شوية اعتقد عدد الساعات اللي اقضيهة بالتعلم راح تقل والسبب يعود للامتحانات الكشرة, بس مع ذلك مراح اتوقف وراح  ابقة مستمر لاخر رمق بالحياة, خل نشوف اكدر التزم بهاي الحجاية للاخير لو لا ذكروني عود

😄

احبكم هواية واتمنالكم التوفيق بكلشي وكلاشي 

استمروا باللي دتسووه انتوا كدهة وكدود

👋يلا طولت عليكم مع السلامة نشوفكم بعد اسبوع من تاريخ هسة