تحدي الـ29يوم - يـوم العشـرين

 

 هلا والله بالطيبين

  ومن بعد مرور عشرين يوم على بداية تحدي الـ 29 يوم اجيتكم بشي بسيط كدرت احققة خلال هاي المدة الفاتت بس مكدرت اكملة ولازم اليوم انشر المدونة فكلت عادي حتلو التطبيق بعدة على النص مو كامل هم لازم اشارككم تقدمي بي

 لذلك اليوم اشوفكم التطبيق البسيط اللي دا اشتغل عليه وبنفس الوقت دا اتدرب واتعلم من خلالة لان للان اني اعتبر نفسي مبتدئ باللغة

خلال العشر ايام الفاتت تعلمت شلون اتعامل وية ال flutter ووية دواله الجاهزة وشلون اسوي استيراد لمكتبات ومصادر خارجية واستفاد منهم بمشروعي وكذلك شلون انسق الالوان والكتابات واي شي بداخل المشروع (التطبيق)

بالبداية جان هدفي انه اتعلم dart & flutter بس بداخل نفسي وقبل التحدي مجنت اتوقع ابدا اني اكدر اوصل لهيج مستوى خلال عشرين يوم فقط وهذا الشي كلش فرحان بي لان اثبتت لنفسي ماكو شي صعب وكلشي اكدر اتعلم ماطول أكو ارادة 

طبعا اني استخدم لابتوب اتعلم عليه بس شنو بالبداية مجنت احتاج مواصفات عالية لان مجرد جنت اتعلم لغة وانفذ بالكونسول ما احتاج محاكي اعرض عليه تطبيقي بس من بلشت اتعلم flutter بلش اللابتوب يصير ثكيل وبطيء بالاستجابة لان 3 او اكثر من برنامج احتاج كوكل وفيجوال ستوديو كود والمحاكي طبعا بالبداية نزلت اندرويد ستوديو بس هذا شفتة كلش ثكيل لذلك استبدلتة بفيجوال ستوديو كود لكن للان اعاني من بطئ الاستجابة بس مو دائما مع ذلك راح ابقة اتعلم على هذا اللابتوب لحد مينفجر 😂

أطمح بعد التحدي اكدر اسوي فد تطبيق كامل خاص بية واستخدم بي الاشياء اللي تعلمتهة خلال هذا التحدي

أني جدا ممتن لنفسي لان كدرت اتعلم شي ممكن يفيدني كلش مستقبلا ويساعدني بحياتي

وكذلك ممتن لأي شخص شجعني خلال هاي الفترة كلهة 

وممتن للابتوب مالتي لان بدونة مجان كدرت اتعلم برمجة😂

    

 يلا اني اتوكل اروح اشوف باجر شنو عندي امتحان حتة وراهة اكمل flutter 

شكرا كلش اذا قريت كل كلامي واذا مقريتة هم شكرا لانك دخلت هنا 

أحبكم ويلا مع السلامة 💞